政壇：政商定格：啟剛晶晶傳博覽館擺600圍
霍家長孫霍啟剛同「跳水公主」郭晶晶盛傳結婚多時，最新講法係佢哋今年九月喺香港結婚，傳聞仲話佢哋將喺機場亞洲博覽館筵開六百圍，如果屬實，相信係城中另一個世紀婚禮。霍震霆接受查詢時首先話「唔係、唔係」，之後就話唔係九月又未定場地，訂咗話你知喎。
我哋曾經就此四出打聽呢個世紀婚禮傳聞係真定係假，啟剛唔少好友都好口密，亦都有人話，相信啟剛嘅世紀婚禮日期會介乎九月或十月，以霍家喺中港嘅人脈關係，要擺六百圍絕對唔出奇，唔想分幾日，只有機場亞洲博覽館夠大可一日擺晒。霍家喺國內同海外人脈深厚，啲親友一落機可直接到博覽館飲喜酒，確實好就腳噃！
霍啟剛（左）同郭晶晶（右）已經多次傳出婚訊，唔知今次傳九月結婚真定假呢？（資料圖片）