政壇：搞搞政：三司勁收禮退休慢慢炒

煲呔曾領導嘅夕陽政府等緊收工，佢自己大貪之外，仲形成咗個疑似當奴鴨「貪心班子」，企埋甚至可以成為「鴨僚街」添。三個司長日前就被本報踢爆兩年嚟收受近千份禮物，當中有三百幾份仲係袋袋平安添！正所謂「貪得唔好嘥，貪完拎去賣」，將來呢批高官印印腳歎世界時，大把剩餘禮物可以賺延後利益，收買佬、夜冷舖大把路揀！

三司中，負責揸數嘅財爺鬍鬚曾收到最多禮物，一○年至今共收到四百四十五份，孤寒財爺落袋嘅都有一百九十份咁多，包括網球拍、網球、玩具，同埋幻燈片遙控器連雷射燈等，呢種貪小便宜嘅風格係咪有曾兄弟影子呢？

律政司司長黃仁龍就似乎有價值嘅至袋，佢收禮唔及鬍鬚曾咁多，只得三百四十二份，但保留嘅全部有價有市，好似中共成立六十周年紀念手錶、○九年發行面值一百五十元嘅紀念鈔票，同埋駐港使節送贈嘅靚酒，通通都有升值潛力。至於政務司司長林瑞麟，上任以嚟收咗一百六十份禮物，幾乎每日都收禮咁滯，佢仲迅速將近六十份留畀自己，包括護膚品同禮物盒等，佢用定送畀老婆o架？