政壇：沈祖堯讚「林瘋」唔貪功
美籍華裔籃球員林書豪迅速喺NBA打出名堂，仲喺全球華人界掀起一股「林瘋」熱潮，中大校長沈祖堯尋日都喺網誌中大講林瘋，佢話欣賞林書豪嘅球技之外，特別讚佢冇被勝利衝昏頭腦，繼續表現出謙卑唔爭功，值得大家學習喎。
沈祖堯話，有美國運動雜誌估計林書豪嘅身價已經超越前NBA球星姚明同高爾夫球好手「老虎仔」活士，無論去到邊度都大受民眾歡迎，但佢接受訪問時卻一直氣定神閒、溫文謙恭，仲謙稱所有勝利「純粹是團隊合作所致」。
沈祖堯認為，體育界同演藝界都出現過好多「盛極必衰」嘅例子，好似活士同一代拳王泰臣咁，如果唔能夠保持頭腦清醒，愛惜羽毛，就好易會被金錢、虛名同權力誘惑進入歧途，迅速從雲端跌下，佢希望林書豪可以繼續寵辱不驚、虛懷若谷，成為年輕一代嘅榜樣。
沈祖堯借林書豪提醒學生要愛惜羽毛，否則好易誤入歧途。（資料圖片）