政壇：陳淑莊四做伴娘無嫁期
立法會議員陳淑莊（Tanya）自從結束八年戀情後，至今一直未有着落，尋日Tanya出席一個婚紗雜誌舉行嘅頒獎禮，自爆過去做過四次伴娘。據講做過三次伴娘，自己嫁人就可能有影響，Tanya做夠四次，難怪已經四張嘅佢至今未有嫁期囉。
講到婚禮角色，Tanya話佢做過姊妹、司儀，連大妗姐都做過，而且做伴娘嗰四次婚禮分別喺香港、澳門同美國，啲伴娘同姊妹裙佢又唔捨得揼，結果擺到一屋都係。講到最難忘嘅婚宴經驗，佢話見過有新娘喊到唔夠紙巾用，亦有新郎哥唔識合巹交杯。咁幾時先輪到佢披嫁衣呢？Tanya笑笑口話：「快o架喇，快o架喇！」