政壇：狠摑貪曾D姐民望飆

特區第一貪官煲呔曾接受富商款待、貪盡海陸空醜聞被踢爆後，佢嘅貪婪品性盡露，更激起滔天民憤，最新公布嘅民調顯示佢民望勁插水，做咗成個政府民望插水龍頭，反而佢嗰堆下屬就因為有擋箭牌，民望唔係有得回升、就係可以止跌，最威嗰個係公務員事務局局長俞宗怡（D姐），今次民調顯示佢嘅支持率淨值激增十一個百分點，係三司十二局之冠。點解？D姐喺煲呔曾貪腐醜聞曝光之後代公務員發聲，力證公務員應該清廉持正，暗摑煲呔曾一巴，收穫咪係民心囉！

睇番香港大學民意研究計劃最新發表嘅民意調查，三司十二局高官嘅民望仍喺低位徘徊多，最搶眼嘅要數D姐，雖然市民對佢嘅認知率都係唔算高，但係今次D姐嘅個人支持率淨值卻上升十一個百分點，係咁多個高官中最高，同佢有得一鬥嘅教育局局長孫明揚，不過，孫公嘅支持率只得二十三個百分點，同D姐嘅四成差幾條街。

義正辭嚴贏公僕掌聲

D姐民望激升都可以話多得煲呔曾唔少，早排煲呔曾貪婪醜聞曝光後，好多公務員都鬼火咁o架，但煲呔曾同特首辦卻狡辯，激起更多民憤，為免公僕隊伍受影響，D姐以公務員事務局局長身份發出新聞稿，強調公務員有既定守則，亦有廉潔持正嘅傳統，暗摑煲呔曾一巴。服務政府三十幾年嘅D姐雖然係問責團隊中人，今次義正辭嚴嘅表現不但贏得公僕掌聲，而且令好多市民不致將對煲呔曾嘅厭惡轉嫁到公僕身上。

由於有煲呔曾墊底，最新民調顯示好多民望不振嘅官員都有止跌嘅現象，好似一向民望沉底嘅政務司司長林公公，評分雖然微跌，但反對佢做司長嘅人就少咗，連因雙非問題畀人鬧爆嘅食物及衞生局局長周一鑊，反對比率都微跌一個百分點。