人妖顛倒是非淆 幸好天地有正氣

人妖顛倒是非淆，對敵慈悲對友刁。《西遊記》中唐三藏被妖孽迷惑，真假不辨，是非不分，令忠心耿耿嘅孫大聖屢遭磨難。神話疑幻似真，信不信由你，但現實版嘅《三打白骨精》，就唔到你唔信嘞。

東方報業不畏強權，不偏不黨，堅持民族大義，多年來不斷受到網上誹謗言論惡意中傷，好明顯係有幕後黑手興風作浪。最莫名其妙嘅係，流傳全球網站嘅八百幾篇誹謗貼文，中國居然佔咗七百幾篇，唔少仲係官方網站，嚴重損害東方聲譽。

為討回公道，伸張正義，東方除咗訴諸法律，不惜代價追緝誹謗者及幕後黑手，舊年亦曾去信國務院港澳辦，要求當局敦促相關網站刪除誹謗貼文，但得唔到回應，誹謗貼文並無消失。

舊年九月，二十七名全國政協常委及委員、全國人大代表、本港行政會議成員及立法會議員聯署去信，再次要求有關部門正視內地網站貼文誹謗東方嘅問題，結果竟然係「零回覆」。

得道多助，失道寡助。今年「兩會」期間，四十名全國政協委員聯署提案，敦促中央正視問題，聯署委員人數之多創下本屆政協會議紀錄，可惜當局一樣充耳不聞，至今未有反應。

太一叮諗極都唔明，北大人口口聲聲「依法治國」，家陣東方投訴冇人管，知名人士聯署冇人睬，連四十位政協委員嘅提案都冇人理，十足十翻版《三打白骨精》，唔通連有法必執呢項法治最基本要求都有「一國兩制」，作奸犯科者匿喺內地就可以逍遙法外？

正如中國問題專家話齋，本港全國政協委員係中央政府同香港嘅溝通橋樑，佢哋嘅提案理應得到中央重視，如果政協委員嘅提案都得唔到採納，難免成為政治花瓶。

話時話吖，人大同政協淪為橡皮圖章同政治花瓶，歸根究柢就係因為執政者漠視民意，忠奸不辨，是非不分。其實，人大同政協裏面有好多正義之士，佢哋不為私人利益，一心一意想為國家、為香港出謀獻策作貢獻，只可惜，「我本將心向明月，奈何明月照溝渠」，幾十位政協委員聯署，阿爺都可以不聞不問，又點樣作貢獻呢？

好彩天地有正氣，喺呢個人妖顛倒、黑白不分嘅環境，今次四十位政協委員拍案而起，仗義執言為東方討公道，正如平地一聲雷，簡直振聾發聵。由於人數眾多，難以一一致謝，太一叮惟有衷心講聲「多謝晒」。當然，舊年二十七位聯署嘅各界知名人士亦為伸張正義作出努力，太一叮喺度一併多謝！全賴你哋，烏煙瘴氣之中總算可以見到一線曙光！