政壇：搞搞政：民調風波纏上李彭廣

特首選舉投票日兩個禮拜後殺到，各種民意調查備受關注。日前我哋就收到位讀者投訴，指摘嶺南大學嘅電話調查有問題，呢位讀者話調查問佢支持邊位特首候選人，但佢一話支持梁振英（CY），調查員就即刻問佢係咪支持CY退選喎。佢雖然即時澄清，個調查員仍然好似錄音機上身咁，不斷問佢有幾多個百分比支持CY退選，令佢覺得成個調查唔夠客觀，好似針對緊某一位候選人。

浸大早排因特首民調周身蟻，今次負責調查嘅嶺大公共管治研究部主任李彭廣話，基於兩個特首候選人近月都有負面新聞，咪問受訪者對唐唐同CY應否退選嘅問題囉。佢又解釋，問題嘅先後次序係由電腦隨機決定，所以唔覺得調查唔客觀同有引導成分喎。李彭廣之前一直幫胡定旭任主席嘅智經研究中心工作，胡定旭撐唐係人都知，而李彭廣重歸嶺大就爆單咁嘅事，難免令人浮想聯翩。不過，做民意調查，最緊要令人感覺公正、信服，唔係隨便打通電話就算數，睇嚟，李彭廣應該執吓工作人員至得。