政壇：唐營A隊攪局一箭雙鵰

自譏為特首選舉陪跑嘅候選人白鴿黨何俊仁（鐵頭仁）參選以來，動作多多，起初只係以「塘邊鶴」姿態出現，近日就開盡火力攻擊CY外，更聲嘶力竭狠批「黑金政治」，被外間貫以「唐英年B隊」，甚至質疑佢對唐英年嘅「感情缺失」同僭建醜聞「高高舉起，輕輕放下」，有分析話鐵頭仁係想攪亂特首選舉，等建制派撕裂後從中得益，為九月立法會選舉撈取政治本錢。

鐵頭仁同佢嘅團隊對CY嘅問題出盡九牛二虎之力全方位攻擊，黨內成員亦疑似裏應外合，搞到佢哋嘅地位大有由「唐營B隊」升級做「A隊」之勢。結果連前港區全國人大代表吳康民都睇唔過眼，早前撰文暗批唐唐「敵我不分」。

其實鐵頭仁同唐唐係咪真「扯貓尾」呢？睇真啲，鐵頭仁立心「抽水」攪亂特首選舉，所得嘅政治好處更多，譬如成功炒起「黑金政治」議題，令建制派形象更差，九月嘅立法會選舉係咪更有利泛民同白鴿呢？如醜聞纏身嘅唐唐上場，民望超低，政府超弱勢，得益嘅咪又係泛民，鐵頭仁撐唐可以坐收「一箭雙鵰」嘅神效，難怪心口掛個勇字做A隊喇。