政壇：查唐宮受阻 屋署打鑼搵業主

特首候選人唐英年同太太喺九龍塘約道嘅大宅有僭建地下王宮，搞到國際傳媒都關注，醜聞嘅其中一個焦點係到底佢哋嘅僭建係咪有預謀、甚至欺騙屋宇署發出入伙紙。事件曝光後，唐英年夫婦雙雙出動補鑊，猛話會全力配合屋宇署調查。然而，事隔半月，屋宇署署長區載佳尋日出席一個活動時卻爆料，指至今未能同僭建物所在嘅業主會面，約道七號係唐太郭妤淺嘅物業，身為家庭主婦嘅佢到底忙啲咩？搞到區載佳要公開尋人。

區載佳尋日出席一個活動後，畀記者追問調查唐家大宅嘅進展，區載佳表示，佢哋已經陸續約見涉及事件嘅人員，主要會針對查證僭建工程係咪喺入伙紙批出前已經進行，佢哋打算邀請約四十名負責工程嘅人士協助，包括結構工程師、註冊承建商、地盤監工等，亦會安排同業主會面，講到呢度，佢都有啲無奈咁話，至今未能同業主會面，又估計整個調查工作計劃喺五月底前完成。

填平僭建物有礙蒐證

署長呢頭放話無耐，焦點就轉咗去聲言「冇喺入伙紙發出前僭建、至今瞓着咗覺」嘅郭妤淺身上，傳媒都即刻搵唐英年回應，點知唐只係透過競選辦簡單回應，話件事交咗畀專業人士，而屋宇署遲遲無法會面嘅郭妤淺，都拿拿聲話搵咗律師同屋宇署接觸。

唐家地下王宮醜聞爆出後，唐英年即刻搵專業人士整咗份復原方案，有意拿拿聲填番佢，但區載佳尋日透露，屋宇署唔批准佢哋即刻填平地下二千幾呎僭建物嘅申請，因為咁樣可能影響署方蒐證同徹查事件。換言之，唐家王宮將成為重要嘅證據，直至屋宇署五月底完成調查，都唔使旨意動一樑一木。