政壇：兒子閃婚黃家和促「造人」
餐飲聯業協會會長兼廠商會常董黃家和（Simon）尋日榮升老爺，公子黃浩鈞（Howard）與燈飾公司太子女陳嘉琪（Iris）拍拖半年、閃電結婚，喺尖沙咀洲際酒店筵開近六十圍。Simon開到口恨抱孫，催促一對新人努力「造人」，尋日仲將家傳之寶嘅玉佩送贈兒子，新抱就送上鑽石手鏈。
除咗新老爺嘅飲食界老友爭相捧場外，一眾青委成員都拉隊恭賀新郎哥，包括恒生新抱何倍倩（Anina），原來兩人係加拿大多倫多讀High School時嘅同窗，Anina大爆新郎哥讀書年代係乖乖學生，氹得老師好開心。
黃家和（左）恨抱孫，叮囑兒子黃浩鈞（右）同新抱陳嘉琪（中）努力「造人」。
何倍倩係新郎哥嘅中學同學，呢晚穿上BCBG晚裝裙飲喜宴。