政壇：蔡仲樑幫完煲呔曾做董事？
海洋公園董事局有新人，政府尋日宣布委任博善廣識有限公司總經理蔡仲樑加入董事局，任期兩年，大家可能奇怪佢係邊個，佢嘅公司旗下原創品牌「麥嘜、麥兜」，一○年農曆新年期間，曾幫過政府製作一條名為「回家真好」嘅賀年動畫宣傳短片，將面目可憎嘅煲呔曾畫到鬼咁慈祥。
當時因為將深受小朋友愛戴嘅「麥兜」同煲呔曾夫婦同場演出，惹來一啲網民議論紛紛，仲發起「拯救麥兜，反對賣仔」行動。嗰頭合作完，呢頭蔡仲樑就獲委任入海洋公園，兩者有冇關係﹖睇怕要搵煲呔曾解畫至知。不過，蔡仲樑領導嘅公司將兩隻豬仔搞到揚名海外，「麥嘜、麥兜」咁紅都係實力派中人，唔知海洋公園以後嘅宣傳會唔會多咗豬嘜嘅影子呢﹖
蔡仲樑獲政府委任為海洋公園董事局成員。（資料圖片）