政壇：傾唔掂數特首選舉論壇或流產
特首選舉一鑊粥，流選聲中，尋日再傳集齊三個特首候選人參加嘅選舉辯論已經接近「流產」嘅消息。十一間電子傳媒一齊搞嘅選舉論壇，本來尋日可以公布辯論細節，點知因為班電子傳媒委員將規矩改來改去，令三個陣營都傾唔掂數，現時要押後到下周一至拍板，分分鐘流產收場。今次拗數關鍵係辯論最後一節嘅「互相開火」環節，本來傾好可以由一位候選人自由向其他兩名對手開火，限時兩分鐘，如此類推。但由於籌委會怕太混亂，觀眾分唔到邊個打邊個，所以改為候選人只可向特定人選發問，即係梁振英（CY）揀咗質問唐英年，何俊仁（鐵頭仁）就唔可以插嘴。
據聞唐營同何營都想「疊聲」大混戰，但梁營就想主攻唐唐，結果大家傾唔掂。據聞三陣營都企到好硬，除非有人肯妥協啦。