政壇：搞搞政：唐營B隊狙擊羅范？

特首選舉進入混戰最後階段，梁、唐鬥到昏天暗地，佢哋嘅助選團隊都瞓身肉搏，尋日朝早，梁振英競選辦主任羅范椒芬、何俊仁競選團團長張文光及唐英年競選辦秘書長何鑄明就代表正印候選人上電台鬥嘴，張文光秉承何俊仁砌梁振英狠過砌唐英年嘅作風，炮口大多對準羅范椒芬，仲大翻羅范舊帳，力數羅范當年做教統局常秘時推行嘅政策不得人心，羅范無喇喇做咗箭靶，唔通張文光認為佢可能重出江湖任教育高官先行狙擊佢，定係又一次「唐營B隊」嘅例證呢﹖

佢哋三個係新一屆特首競選班底嘅核心人物，尋日三個幕後操盤者上電台辯論教育政綱，張文光就幾乎全程對準羅范嚟打，話依家教師壓力大，工作量多，有三分一工作都同羅太當年推行嘅教改有關，令教師好憤怒。羅太坦言，教改唔係由一個人負責，又指張文光喺教育統籌委員會多年：「喺出面就反對，入面就拍膊頭，我都話你係暗地裏嘅老友記。」暗寸張文光內外不一。

其實，特首之戰，梁、唐先係主要對手，何俊仁都話自己係打擦邊球，逼兩人畀多啲承諾，點知落到場，張文光卻好似同何鑄明聯手夾擊羅范咁，特首選舉到底係兩個打一個，定係三人互揪呢﹖