政壇：Paul烏龍梁家騮梁家傑不分
立法會舊年喜事重重，中年議員相繼結婚生子，尋日保安事務委員會開會，旅遊界議員謝偉俊（Paul）發言時話，啲BB個個都似樣，好似涂謹申同梁家傑嗰兩個BB咁，都好難分到啦！畀佢點名嘅阿涂百思不得其解下插嘴：「梁家傑個仔好大個喇喎！」阿Paul此時先知擺咗大烏龍，提問完即時澄清，其實佢講嘅係啱啱上月生完BB嘅醫學界「怪醫」梁家騮至真，阿涂就笑笑口話：「咁就差唔多！」搞到議事廳一陣笑聲。
尋日立法會討論雙非問題，有議員關注有孕婦喺香港生完仔，然後將出生證件畀其他內地BB過關來港，問入境處能否分辨？阿Paul更關注會唔會有人以BB太似樣嚟一招「貍貓換太子」，點知佢就將梁家騮噏咗梁家傑。阿涂個BB去年底先至出世，依家得幾個月大，「怪醫」嘅BB就啱啱上個月先出世。
梁家騮早前升級做爸爸，攬住ＢＢ笑得好開心。