遙遠東方有條龍 他的名字叫東方

龍出東方，陰霾盡掃；魅影魔蹤，無所遁形。今年龍年，係東方龍大發神威嘅時候，且看我哋剷除妖孽，匡扶正氣，大快人心。

　 講到妖孽，最卑鄙惡毒嘅，莫過於魯迅先生所講嗰啲專放冷箭，含沙射影，肆意詆毀嘅無恥之徒。東方報業集團多年來秉持公義，為民請命，成為正義傳媒重鎮，深得讀者支持。不過亦正因為咁，東方被唯恐天下不亂嘅小人視為眼中釘，欲毀之而後快。近年網上出現大量惡意中傷，造謠抹黑嘅貼文，令東方聲譽嚴重受損。奇就奇在，誹謗貼文內容大同小異，來來去去都係嗰幾個版本。更奇怪嘅就係，呢啲無中生有嘅貼文，經常會失驚無神突然激增，無處不在，遍布十幾個國家及地區，尤其係內地，情況更加猖獗，極不尋常。

正如全國政協委員劉夢熊話齋，網上出現咁多誹謗性文章，幕後好明顯有黑手操縱，有商業對手行正路贏唔到東方，惟有匿喺陰暗角落出埋啲那渣招，打擊東方抬高自己。最令人莫名其妙嘅係，誹謗貼子最多嘅竟然係內地網站，有立法會議員形容，同當年民族英雄岳飛被以莫須有罪名誣衊陷害如出一轍，唔通真係愛國有罪，賣國有獎？

犯東方者，雖難必誅，雖遠亦必誅！多年來，東方為捍衞聲譽，討回公道，不惜花費龐大人力物力，鍥而不捨，誓要揪出發放誹謗貼文嘅牛鬼蛇神，以及匿喺幕後嘅黑手。今次更加發出「通緝令」，對提供可靠證據人士懸賞厚酬，唔將始作俑者繩之於法，誓不罷休！

金猴奮起千鈞棒，玉宇澄清萬里埃。經過一輪窮追猛打，東方已經成功揪出一批發放誹謗貼文嘅高登「網民」，佢哋已經喺《東方日報》、《太陽報》及on.cc刊登道歉啟事，有人仲要賠償東方損失添。

若要人不知，除非己莫為。嗰啲誹謗東方嘅牛鬼蛇神，如果以為互聯網只係虛擬世界，就算隨便散播誹謗言論，都唔使負責任，咁就大錯特錯喇。東方報業先後發現八百幾篇誹謗貼文，並已向包括內地同海外全球二百幾個網站發信或電郵，要求刪除有關言論，更向法院入稟控告其中九個網站誹謗。目前已有五百篇貼文被刪，其中包括美國、香港、內地及台灣嘅十六個網站更向東方致歉。

僧是愚氓猶可訓，妖為鬼蜮必成災。言論自由唔係誹謗自由，太一叮正告嗰啲肆意煽風點火，詆毀正義傳媒嘅牛鬼蛇神同埋幕後黑手，惡有惡報，時候一到，一切都報。「遙遠東方有條龍，他的名字叫東方」，網絡無遠弗屆，東方報業剷除妖孽嘅決心同樣無遠弗屆，你哋不妨放馬過來，明槍又好，暗箭又好，東方一定奉陪到底，即管睇吓邊個可以笑到最後，叮！