政壇：邱子傑千度近視唔做激光
溥儀眼鏡店老闆Jeffrey邱子傑，向來好少戴眼鏡出席公開場合。咦！竟然唔做生招牌？其實佢自細就有近視，學生時代同眼鏡結上不解緣，隨住年齡增長，佢嘅近視度數早已突破一千度大關，但佢覺得唔適合做激光矯視，所以一直只戴隱形眼鏡。
佢又話內地消費者講求高品味，所以高檔嘅眼鏡產品好搶手，加上佢又留意到好多年輕人只戴眼鏡框，意味眼鏡好似時裝咁講求潮流嘅觀念，已經被年輕一代受落，所以眼鏡業真係唔憂做。
為咗緊貼眼鏡業界嘅動向，Jeffrey話稍後會飛去米蘭出席眼鏡展覽會，吸收吓最新嘅潮流資訊咁話。
