政壇：蕭若元租深圳「禮賓府」被拒
貪盡海陸空嘅煲呔曾被揭發以每年一百萬元「超筍價」，承租富商黃楚標喺深圳東海花園嘅複式豪宅，煲呔曾認衰退租後，傳媒人蕭若元見個單位裝修豪華，租金又咁「實惠」，即向黃楚標表示想承租，點知換嚟黃一句「玩嘢」，搞到蕭若元好唔忿氣。
為表誠意，蕭若元拿拿聲委託律師行跟進，仲擺低三百萬元「誠意金」支票喺律師樓度，諗住用呢個「市值價」預支單位嘅三年租金，律師行仲即發信畀黃楚標，諗住盡快傾承租單位，仲講明會等煲呔曾嘅舊租約搞掂後至承租，點知黃楚標遲遲都冇回覆。
蕭若元話可能黃楚標認為任何人提出同煲呔曾同樣條件租個單位都係「玩嘢」，因為一百萬元根本唔係市價，佢亦唔係特首，畀唔到乜嘢好處人哋，佢希望黃楚標向公眾解釋清楚。