政壇：豪遊食宿費 貪曾唔識答

東方報業集團獨家撕破「曾貪心」假廉潔面具，市民睇到無不怒火中燒。雖然曾貪心敵唔過滔天民怨，以唧牙膏方式交代佢嘅貪婪實況，但大家絕對唔能夠就此收貨，事關佢披露咗嘅，只係幾年嚟富豪私人遊艇或者私人飛機嘅交通費，而期間佢喺澳門或泰國布吉嘅食宿費用，至今仍然係個謎，市民同身為代議士嘅立法會議員，絕不能就此罷休。

曾貪心鑽盡空子貪盡海陸空，自創接受外訪嘅守則，就係交通費畀市價，連公務員事務局嘅意見都唔去諮詢，兩公婆畀五百蚊搭豪華遊艇由澳門返港。不過佢自創嘅只係交通費嘅準則，可能佢自己都覺得太牽強，住宿同飯餐佢都費事自創一套計法，所以問佢外遊食宿點計，佢計嚟計去，都答唔出個所以然。

議員揸流攤必遭唾棄

喺住嗰方面，曾貪心幾次外遊，今年二月同舊年四月佢兩公婆去澳門住喺私人遊艇，而舊年去泰國布吉又係住喺私人遊艇，單單畀渡輪票價就有得搭私人遊艇兼住埋喺隻遊艇度？邊有可能咁筍呀？根據佢跟市價付費嘅準則，兩公婆畀番五百蚊一晚囉。

講到食，佢大大聲話喺澳門坐遊艇時食咗個早餐，食嘅係生果、豬骨粥同炒麵，諗住可以甩身，但根據《太陽報》同《東方日報》嘅報道，佢去到澳門嘅時候歎盡兩頭鮑、鵝肝、靚牛扒，仲有十萬蚊一支嘅紅酒，就算佢唔認，我哋嘅可靠消息話，佢哋一行十人去咗澳門凱旋門酒店嘅高級上海菜館食咗一餐，嗰餐盛惠二萬七千蚊，菜式有魚翅鮑魚龍躉，點計呢？唔通佢又自定規則，畀番一百蚊？真係愈講愈荒謬。

所謂事無不可對人言，免費食宿都係款待嘅一種，點解佢只係肯交代交通費，對食住開支避而不談？我哋作為第四權力，一定追究到底，但立法會班議員唔好以為出動特權法不成、彈劾又唔得就可以怠慢，否則市民同選民都會看在眼裏o架！