餘孽政棍護淫 積犯又被放生

《爽報》堪稱「全球最年輕淫賊」，獻世短短幾個月，除咗收到二百幾宗投訴，更破天荒累積多達廿三項被淫審處評定刊載不雅物品嘅紀錄，其中十一項已由影視處提出票控。

呢十一項票控尋日終於有結果，雖然《爽報》全部認罪，但每項罪名僅判罰款一萬蚊，合共罰十一萬蚊。裁判官當庭直指，有關文章已經超越引人性興奮嘅界線，根本唔應該出現喺任何人包括小童都可輕易接觸得到嘅報紙。

話時話吖，干犯發放不雅物品罪，首次定罪最高罰款四十萬及監禁一年，再犯可判罰款八十萬及監禁一年，今次每罪只係罰一萬蚊，犯罪成本低到離譜，唔止毫無阻嚇作用，直頭等於變相鼓勵犯罪。

色情資訊傷風敗俗，後患無窮，對公然違法者必須從嚴處置，以儆效尤。舉個例，根除賣淫最煞食一招，係查封「老舉」做不道德交易嘅場所，除淫務盡，一了百了。當局今次處理《爽報》散布不良資訊手法，等於搵到淫竇唔封舖，係咁意向妓女罰些少錢就算，擺到明玩縱容放生啫，叮！

講真，《爽報》面對千夫所指，如果冇港英餘孽保駕，無恥政棍護航，點可能視法例如無物，宣淫販賤繼續爽吖。講開又講，壹淫媒旗下刊物違反《淫褻及不雅物品管制條例》過百次，如果影視處同淫審處嚴格執法，揸正嚟做，淫媒早已經破產執笠，淫賤黎可能要瞓街喇，點可能繼續為所欲為，害人害物！

護淫做到出晒面嘅，除咗有法不執，公然徇私嘅港府，仲有平時道貌岸然，其實同淫媒一路貨色嘅政棍。呢，前排十八個團體喺立法會公審《爽報》，泛民議員居然絕大部分既失憶又失聲，裝聾扮啞，只有一人發言，亦只係顧左右而言他，九唔搭八。

無他嘅，淫賤黎早前畀人踢爆，過去幾年分別向白鴿黨同公文袋捐款過千萬。開講有話，受人錢財，替人消災，佢哋又點可能同米飯班主過唔去，打爛自己飯碗至得o架。所以話啫，呢班政棍同淫賤黎根本係一丘之貉。

多行不義必自斃，市民眼睛係雪亮嘅。壹淫媒傷風敗俗，荼毒市民，早已引起全城公憤。關注團體三八婦女節前夕發起遊行，抗議《爽報》等不良傳媒荼毒青少年，有立法會議員狠批港府除淫不力，護淫不已，助長歪風。

港英餘孽出賣公義，無恥政棍出賣靈魂，同淫棍狼狽為奸，互相包庇，搞到香港烏煙瘴氣。咪話太一叮唔提醒，市民遲早會同呢班牛鬼蛇神算總帳，叮！