政壇：政商定格：周國豐諗住生女空歡喜
周國豐同太太Jenny黃泳霖前晚出席護膚品活動，腹大便便嘅Jenny透露下個月就係預產期，由於BB仲未掉頭，所以擔心未必可以自然分娩，可能需要開刀。已有一子嘅佢今次又懷男胎，問佢會唔會追個女？佢笑言：「如果再生又係仔咁點算﹖﹗唔再生住。大仔冇呷醋，我問佢細佬喺邊，佢仲識指住我個肚。」
周國豐幫口話：「我朋友有三個仔，經常打爛屋企嘅嘢。」咁追個女可以湊個好字嘛！佢話：「都係。」Jenny仲打趣話：「可能生出嚟係女呢！因為之前照嘅時候，BB唔係好合作。」周國豐就話：「Jenny初時有咗，佢同上一胎嘅反應好唔同，我哋以為呢胎係女，點知照完，醫生話係仔，我哋都要一段時間先適應，如果生出嚟係女，真係好驚訝。」
周國豐（左）同太太黃泳霖透露下月就係預產期。