政壇:唐唐感情缺失二三十年

特首候選人唐唐尋日又擺老婆上枱,喺三八婦女節前夕派遣太太郭妤淺上電台,代佢解釋近日熱爆全城嘅私生子女醜聞,但唐太點都唔肯透露丈夫「製造」私生子女嘅具體日期同次數。不過,提名咗唐唐嘅全國政協常委何柱國,尋日喺北京被問及有關問題時,就大爆事件係喺二十多三十年之前發生,強調唔係呢一兩年加入政府後至發生嘅事。

何柱國又話唐唐接連爆出嘅婚外情、僭建地下王宮同私生子女醜聞,全部都係佢個人私事,係唐唐同太太之間嘅事,唔似另一候選人梁振英涉及嘅西九及城大風波咁,係涉及公帑運用嘅公事,所以公眾同傳媒毋須對唐唐咁擔心喎。

問及唐唐應否公開私生子女身份,以免將來做咗特首後,對私生子女作出利益輸送,公眾都唔知?何柱國話唐唐依家只係選緊特首,呢個問題應該等佢真係當選咗先再解決。至於可以點解決,何柱國直言自己都唔知,叫大家等唐唐當選後再直接問對方喎。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報