政壇：御廚爆貪曾充闊佬

煲呔曾貪婪成性經已街知巷聞，佢嘅本性其實仲係孤寒兼度縮，直頭係縮骨算爆！曾經喺曾貪心做財爺時做過官邸家廚、自封為「御廚」嘅大廚于燕平師傅，尋日現身一個公開場合時，大爆曾貪心孤寒、不識大體嘅瘀事。

于師傅爆料話，有次上海市政府送咗箱大閘蟹畀度縮曾，於是度縮曾請咗班朋友去官邸歎蟹，但請還請，佢指示于師傅一人只限一隻蟹，剩低落嚟嘅要留畀佢送畀其他人。

請客食大閘蟹 限一人一隻

大閘蟹係唔少人心頭好，試問一人一隻點夠食吖？喺朋友面前度縮曾又唔衰得，於是佢嗱嗱聲走入廚房叫于師傅諗計，前提係唔可以用多一隻大閘蟹，但大家又有用蟹煮嘅餸食。于師傅好有信心咁同佢講，畀二十分鐘佢就搞掂，之後于師傅端出一味「無骨大閘蟹」畀眾賓客食，度縮曾當堂嚇到面都青埋，食完之後氣急敗壞衝入廚房，睇吓有冇少到大閘蟹，原來于師傅煮出味道同真蟹無異嘅賽螃蟹，「無骨大閘蟹」裏面係無蟹嘅。

煲呔曾用發霉月餅奉客，仲拍枱問啲月餅係邊個送。我哋又聽到另一個月餅故事，就係佢將月餅放喺雪櫃，一年後收到下一年嘅月餅，至喺雪櫃拎番啲月餅出嚟畀下屬「享用」，于師傅話呢啲都係珍珠都冇咁真嘅事實。除咗貪心同孤寒外，原來度縮曾都幾唔識大體。話說有一次度縮曾請咗位中聯辦朋友去官邸食飯，度縮曾又指示于師傅不能怠慢，然後入房裝身。裝身出嚟，于師傅見到度縮曾穿唐裝短打，衫上掛咗條金鏈，忍唔住問度縮曾係咪咁樣見客？度縮曾死撐話件短打花咗成幾萬蚊喺中環買嘅，于師傅好率直咁同度縮曾講，話佢着到成個「蠱惑仔」或者拉黃包車師傅咁唔多好，度縮曾先至肯換番佢套制服：西裝加煲呔。