唐太十大精彩對答

問︰節目主持與聽眾

答︰唐郭妤淺

問︰發現感情出問題時有甚麼感覺？

答︰梗係唔開心，但係第一唔好即刻發脾氣，靜低諗諗，我係咪疏忽咗佢呢？係咪冇時間陪佢呢？我自己有冇唔好嘅地方呢？

問︰面對丈夫有婚外情如何接受？

答︰Henry（唐英年洋名）個人唔係完美，將好嘅地方同唔好嘅比較，如果九十個percent（百分比）係好嘅，點解用十個percent整到佢唔好，令你九十個percent都唔記得咗？

問︰唐英年是否花心的人？

答︰佢係感情豐富嘅人，呢幾十年行出軌道係有，不過每次佢都返嚟，我知佢忠心愛我已經好足夠。你畀佢多啲自由，佢返屋企係佢自己返嚟，唔係我逼佢返嚟o架。

問︰唐英年有多少次婚外情？

答︰千祈千祈唔好向後望，次數都唔好數……唔開心啲嘢唔好去諗，啱唔啱？

問︰點睇有報紙刊登唐英年疑似私生女照片？

答︰其實我冇咩感受，佢自己會處理，同埋係好耐嘅事。佢會終生後悔，已經係好大嘅懲罰……佢話佢會對以前行為終生後悔，一個人浪子回頭好緊要。

問︰唐英年多次讓妻子為其醜聞解畫，是否「冇膊頭」？

答︰我九歲識唐生，十九歲同佢拍拖，廿九歲同佢結婚，呢二十年我觀察佢，知佢嘅弱點同佢嘅強項，我係好甘心今世做唐太，我做人唔會放棄。

問︰連串醜聞後夫妻關係如何？

答︰由選舉開始廿四小時一齊工作、一齊傾、一齊面對……話佢係呢個城市最孤獨嘅人又得，最多朋友又得。

問︰有否考慮過與唐英年離婚？

答︰我好believe in marriage（相信婚姻），如果個人係啱嘅，真係應該結婚，有一個contract（婚約）好多嘢唔會咁易放棄。

問︰對唐英年不離不棄是否值得？

答︰佢係九十九分嘅爸爸，九十分嘅老公，今時今日由頭嚟過，我都會嫁畀唐英年。

問︰點睇唐宅僭建風波，被指被「擺上枱」承擔責任？

答︰成件事我做出嚟，唐生想保護我，成件事愈講愈亂……每間屋係一個避風塘，畀佢返嚟可以休息，好靜咁rest（休息），點知避風塘變咗戰場，我好難過。趁呢個機會，向香港市民，尤其係支持我哋嘅選委再講一句對唔住，希望你哋原諒我哋。