上海仔驚爆 與唐東京夜會

被指「坐鎮」特首選舉飯局，近日成為新聞人物的「上海仔」郭永鴻，昨日接受東方報業集團專訪時，駁斥有關報道「作古仔」：「我唔關心政治，邊個做特首關我咩事？」郭更驚爆：「我唔識梁振英，反而我識唐英年！」他自爆曾與唐英年共度「東京之夜」，「○二年十二月二十二日喺東京一間酒店，我由林建岳介紹同唐生坐埋，之後仲有下文。」郭強調本着「井水不犯河水」做人，而有關報道「係擺我上枱嚟抹黑梁振英助選團，對我造成好大困擾同生意損失。」故迫使他現身反駁，除考慮採取法律行動，更揚言「逐單」爆料。

現時經商的郭永鴻昨日接受訪問時，自言做人一向低調，更不想見諸於報端，但近日突然成為雜誌封面故事主角，更被指「坐鎮」梁振英競選團隊與鄉事委員會成員的飯局，又指他與挺梁的全國政協委員劉夢熊有來往，有關報道對他造成滋擾，當中情節完全「靠估」，令他無端捲入政治，他不得不澄清及反駁。

「有人將我拉埋去啲選舉嘢一齊講，係轉移視線達到個人目的，對我同梁陣營啲人都唔公道。」郭永鴻稱不關心政治，亦不關心誰做特首，他認識很多鄉事背景的朋友，可能有不同陣營支持者，「唔通話我去影響佢哋，更何況我唔識梁振英。」郭及後竟自爆：「我從未見過梁振英，反而我見過唐英年！」

此語一出令記者感到驚訝，立即追問他如何認識唐英年，郭指認識唐時，他任職工商及科技局局長，介紹人則是林建岳，時間是二○○二年十二月二十二日晚上，地點是日本東京帝國酒店。「當時我同女友人去日本東京，喺酒店度林建岳介紹我同唐生認識同坐埋，我好記得，因為我印象中好似做冬，仲話又會咁啱嘅。」記者追問之後有何事發生，郭稱：「梗係有下文啦，好戲在後頭，不過今次唔講住，留番下次啦，我淨係想講，真的假不了，林生唐生可以話唔識我o架。」雖然記者再三追問，但郭不願再詳細透露在「東京之夜」他和唐英年的一段私密往事。

必要時逐單爆料

郭稱，他三十年前已涉足新界土地事務，但至兩、三年前才認識新界鄉議局主席劉皇發，「喺半島酒店一個場合認識發叔，我敬重發叔，之後我捐咗近百萬元畀鄉議局重建，佢哋有好多場合同飯局都會邀請我出席，好平常。」至於劉夢熊，他是在三個月前才認識，「係由北京一個高官介紹識佢，大家只係朋友。」而有關報道所指二月十日的流浮山飯局，他是應一名鄉事委員邀請出席，與劉夢熊無關，他到達時亦無與劉打招呼，席間亦不見有人離席。「覺得個報道幾好笑，多謝咁畀面我，但我冇咁巴閉，我何德何能去影響人哋選邊個？如果我有去嚇人，咁應該有人去報警拉我，否則唔應該抹黑我。」

郭強調，他在香港商界、政界有很多朋友，亦認識不少內地高官，亦常一起吃飯，有關報道令他很困擾，「一日幾十個電話打嚟問我，啲朋友仲會唔會同我做生意，呢單報道令我精神同生意上都有損失，我都唔知應該要攞番幾多錢。」他稱，正和律師商討，不排除採取追究行動，因為有關報道觸犯了他「人不犯我，我不犯人」的底線，必要時會「逐單逐單爆料」還擊。

本報記者昨晚向唐英年競選辦查詢唐是否認識人稱「上海仔」的郭永鴻，以及○二年的東京之會。唐競選辦回覆指，唐英年對郭永鴻此人「並無印象」，從未認識他，亦未有與他有任何來往。林建岳透過下屬回應說，十年前的事已忘記，但承認在社交場合認識「上海仔」，至於是何時認識則已忘記。另外，梁振英昨晚出席演藝界論壇時強調，他對自己及競選辦同事的操守均有嚴格要求，有關飯局是由鄉事派朋友安排，絕無「江湖人士」介入選舉或威嚇選委等情況，相信事件不會影響其選情。