政壇：搞搞政：港台65萬製回歸擦鞋節目

由公帑支持嘅香港電台，經常畀人話係官媒，睇番佢哋今年嘅財政預算，雖然係少咗，但都大拿拿用咗六十五萬元去製作特區成立十五周年紀念節目，開支仲多過倫敦奧運嘅節目。搵政務官出身嘅鄧忍光空降做廣播處長，今次實水洗唔清，話政務官「特備」節目去擦政府同北京嘅鞋喇。

政府今年撥款近二億三千四百萬元畀港台嘅電台部，比舊年少咗百分之二點三。但係就為特區政府成立十五年花咗六十五萬元去做四十二小時嘅特備節目，佔電台直接開支近百分之一點三。而立法會選舉同嚟緊倫敦奧運嘅節目開支分別只有六十萬元同五十萬元，時數亦分別得四十小時同三十小時。

雖然要使成六十五萬元，但係如果市民鍾意睇係值嘅，所以最好就係衡工量值喇。

之不過鄧忍光就話，各個特備節目係喺唔同頻道、日子同時間播出，所以難預計收視率或收聽率喎。咁即係話乜都佢講晒囉！