政壇：郭位樓股唔炒寧住宿舍

尋日喺馬場遇到城大校長郭位，佢自爆仍住喺城大提供嘅宿舍，冇樓揸手。原來佢都係「缺宅男」，莫非對香港樓市冇信心？非也，佢話家在台北多年，仍未嘗做業主滋味，理由係工作太忙，不時周遊列國，睇樓都唔得閒。佢笑言生活只求有瓦遮頭，冇諗過買樓致富。

郭校長仲話港人熱衷嘅炒股遊戲，都唔啱佢，事關無時間刨股經。尋日應邀入馬場，只落注四十元買「位置」，佢話讀書時研究或然率，發現買馬遊戲其實輸多贏少。好彩眼光準繩，贏咗八十幾元，算有交代嘞！

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

郭位唔熱衷炒樓致富遊戲，寧做「缺宅男」。