政壇：貪曾賣飛拖無本生利

極大想頭嘅煲呔曾一心想名留青史，點知被踢爆係「曾貪心」，結果落得個遺臭萬年，可算係咎由自取。

雖然曾貪心上周四喺立法會特別答問大會上，扮晒死狗咁決定唔再租住豪宅，但從佢Chok極都Chok唔出鱷魚淚，而且仲好晦氣咁話以後都冇人敢再請佢坐私人遊艇、私人飛機，大家自然判斷到佢係咪真心悔改喇！

《ontv》影片 場面壯觀

政府宣傳片都有講：今時今日，咁嘅態度係未夠o架！曾貪心有錯又唔認、認咗又唔改、改咗又唔服，難怪剛過去嘅周五有近萬人遊行抗議，人民力量前日更發動六千三百人「全城打小人」活動，仲有市民燒完紙紮曾貪心、打完小人都唔能夠宣洩心中嘅怒火，之後齊齊上禮賓府聲討「曾貪心」。

若果大家嫌六千幾人打小人未夠壯觀，就真係要睇番東方《ontv》拍低嘅影片喇，幾千人同時將手中嘅拖鞋掟入禮賓府，七彩嘅拖鞋都係瞄準曾貪心呢個目標，場面極之震撼。

霎時間數以百計嘅拖鞋擲入禮賓府，以煲呔曾貪盡一切大小便宜嘅劣根性，佢同老婆名正言順接收晒呢批膠拖都唔怕被人話佢受賄，留番嚟自用或送禮皆宜，再盡啲，索性退休後開檔賣番晒出去，嚟個無本生利。兩公婆一面執拖鞋，好可能一面仲心諗：「大家不如掟啲金銀珠寶入嚟柴我台啦！」佢就想嘞。

我哋喺度呼籲，若果將來市民見到有人兜售來歷不明、可能湊唔夠一對，又或者尺碼唔齊備嘅膠拖就必須要小心，因為呢啲膠拖好可能來自禮賓府，係市民用嚟打曾貪心小人嘅膠拖。據聞呢啲膠拖本來只係值五蚊一對，如果市民想回購呢啲膠拖，再打曾貪心小人的話，千祈唔好畀多過五蚊。