舞弊歪風不可長 槍手代考須嚴打

香港素有「廉潔之都」稱號，對貪污舞弊絕不姑息，如果唔係，市民就唔會對「香港第一貪官」曾蔭權咁深惡痛絕，幾千人上街示威打「曾小人」啦。係喎，今日驚蟄，太一叮都要應吓節至得，打你個煲呔頸，等你冇得瞓遊艇！打你個煲呔眼，等你冇得再扮喊……

即係咁，貪污舞弊，貪污同舞弊往往係同根同生嘅孖生兄弟。煲呔曾貪腐教壞細路，學生哥隨時被法紀敗壞嘅貪腐病毒感染，爆出集體考試舞弊醜聞，咁就該煨咯！嗱，唔係吹水o架，危機就擺喺眼前！

呢，「托福」英語公開試早前咪揭發考試作弊案嘅，當場拉咗三名內地「槍手」。大家咪以為係個別事件，本報記者喺廣州直擊槍手集團運作，發現網上代考廣告滿天飛。中介公司招募情況猖獗，不義之財有冇煲呔曾搜刮得咁多，不得而知，但嗰副大小通吃來者不拒嘅狼胎樣，應該不相伯仲。

內地乜都假，造假技術出神入化，估唔到考試造假一樣咁專業。中介公司拍心口保證，包代考獲各類英文公開試，槍手全屬高材生，以真證件入境香港，再以「考生假護照」入試場，擔保萬無一失咁話。佢哋仲大派定心丸，指上次三名行家失手，只因無做足工夫，強調公司係信心保證，爭在冇拎張優質證書出嚟咋！

更難得嘅係，咁專業嘅一條龍服務，都係索價一萬四千蚊，仲係港紙喎。對一事無成而又毫無法治觀念嘅紈絝子弟嚟講，呢類請槍舞弊嘅誘惑性，隨時大過偷雞摸狗私建地下王宮！

唉，不幸而言中，內地槍手大軍壓境，有中介公司透露，每期學能傾向測驗至少收四十幾名香港客仔，托福試高峰期每個月做五十幾單香港「柯打」。即係話，學生集體舞弊嘅歪風同高官貪腐一樣，已經無聲無息侵蝕緊香港。咁搞法，香港容乜易倒退到行賄受賄橫行肆虐嘅黑暗歲月o架？

喂，本報揭露煲呔曾貪腐醜聞，港府就話投鼠忌器啫，內地槍手集團同你哋無親無故喇啩，唔該快快做嘢，堵塞請槍代考漏洞，聯絡內地當局打擊不法之徒。

香港一旦淪為槍手集團嘅搵食樂園，所剩無幾嘅國際形象勢必損上加損。港府繼續闊佬懶理，唔通又要港人用另類方法斬妖除魔咩？打你隻小人手，等你有試唔識考！打你隻小人腳，等你冇得嚟香港……