SUN微博：打橫嚟講：咁仲成世界？

剛擢升為天主教樞機的湯漢主教，喜孜孜的會見傳媒，並早有準備地，從懷中取出「貓紙」宣讀，力挺曾蔭權為人「真誠」及「誠實」，吓！但當被記者要求舉例如何真誠時，湯主教卻說不出任何一次具體實例，只以笑掠過！

作為一個社會領袖，其言行有一定影響力，遂必須謹慎正派，黑白分明，不得胡說虛假。

曾蔭權被傳媒揭穿種種貪腐瀆職之惡行，證據鋪陳，禍港殃民，萬人喊打；立法會給他機會申辯，佢仍厚顏無恥，將罪諉過市民，錯不在他，如斯品行，如何能鑑定為「真誠」呀！主教！如果曾蔭權係啱嘅，咁全港傳媒、市民咪錯晒？

仲有，曾蔭權身為天主教徒，竟動用公帑重金禮聘風水佬擺陣設局，信術數多過信天主，連上帝也不放在眼內呀！主教，你還敢撐佢「真誠」？我呸！

天子犯法，應與庶民同罪。曾蔭權以在官場四十多年的「行政」經驗來鑽空子，找法律罅，竭力繞過法網，其卑劣缺德之手段，嚴重破壞香港廉潔招牌，累香港蒙羞，若不受到應有的制裁，是天無眼呢！你仲寫定讚美佢嘅「護短」宣言，我連你都睇唔起矣！

阿當夏娃吃了一口禁果，就被逐出伊甸園，這是賞罪分明的鐵證，也是體現社會道德的法則。曾蔭權以權謀私，仍得到嘉許，咁仲係一個乜嘢世界呀？主教！

彭志銘：次文化考古學家，對城中潮語有深入研究，博徵博引，廢官廢人行埋一邊。