曾商勾結天不容 全城齊打真小人

天靈靈，地靈靈，北斗七星，南海觀音，急急如律令。打你個小人頭，打你個小人面，打你個小人嘴，打你個小人肚，打到你有錢唔識收，有樓變揸兜……

喂喂喂，因乜事幹太一叮咁勞氣打小人，小人又係邊個呀。咪就係香江和珅煲呔曾囉。自從本報踢爆佢「貪遍省港澳、歎盡海陸空」連串醜聞，佢就淪為過街老鼠，人人喊打。弊在佢面皮城牆咁厚賴死唔走，喺立法會接受公審又拒絕認錯，仲頭耷耷、眼濕濕扮可憐，以為可以蒙混過關，你話喇，咁嘅無恥小人，唔打點得o架。

今日三月三，係時候同曾小人算總帳嘞！民間團體發起遊行，市民一於用腳向香港第一貪官說不，向曾商勾結說不，誓要扯甩禍港殃民嘅煲呔！

有咁啱得咁蹺，三月五日就係農曆驚蟄，按照民間習俗，最適宜「打小人」發洩不滿，解除災禍。所以話啫，人在做，天在看，煲呔曾禍港劣迹罄竹難書，家陣連個天都睇唔過眼，呢啲就叫自作孽不可活嘞，叮！

講起煲呔曾小人得志，何止曾商勾結、利益輸送呀。曾班子管治無能，官場道德淪喪，財團橫行無忌，經濟畸形發展，民生苦不堪言。就以醫療嚟講吖，簡直病入膏肓，醫學界人士曾經提出好多改善意見，煲呔曾居然好似借咗聾耳陳隻耳咁，詐聽唔到。最離譜就係，佢居然以權謀私，涉嫌迫使醫學會畀佢留學英國讀醫嘅兒子喺本港免試執業，又喺佢新抱考試肥佬嗰陣，請主考老師食飯，唔怪得畀醫學會鬧佢「誠信有問題，真係抵打」咯。

想打曾小人嘅，各行業各階層都有，住劏房嘅基層市民不滿佢忽視低下階層，N無人士不滿預算案派糖一再歧視佢哋……佢哋話到明今年打小人，首選煲呔曾，次選就係佢嘅沙煲兄弟財爺鬍鬚曾。

最搞笑嘅係，環保組織負責人見到煲呔曾張相即刻忍唔住除鞋打，大鬧「氣候逃犯」係香港嘅小人，只敢向小市民開刀，對大財團卻隻眼開隻眼閉，任由電力公司瘋狂加價。有通識老師話，最慶係煲呔曾自己失德不特止，對成立懲罰失德教師嘅機構亦一拖再拖，為禍下一代。勞工界人士更狂炳曾小人漠視零散工人權益，縱容剝削，直頭係「抵打」！

小人不除，港無寧日。煲呔曾與民為敵，倒行逆施，上台七年，香港衰足七年。三月三，齊反貪，今日係大家行出來嘅時候嘞，貪官不下台，我哋日日來！