政壇：夏佳理要搵無敵接班人
港交所主席阿Ron夏佳理將喺下個月卸任，佢尋日喺上海出席一個研討會時，就首次列出候任主席人選嘅條件，佢話要具備商界、專業界、市場同國際領域等經驗。嘩！新主席要涉獵咁多範疇，要求都幾高喎！但阿Ron強調，其繼任人選係由政府決定。
港交所喺四月舉行股東大會，主席屆時會退任，而下屆特首如無意外將喺本月二十五日敲定，故依家好多下任主席「浮面」嘅名字都係揣測，大家都係耐心少少等吓喇！
出席同一場合嘅港交所行政總裁李小加就話，同阿Ron合作愉快，覺得佢係一個頂天立地嘅人，小加並希望可以同下一任主席繼續有良好合作。外界都估阿Ron離任前會同李小加傾埋續約問題，觀乎李小加話好希望同下屆主席有良好嘅合作，佢續約已差唔多呼之欲出。
李小加（右）話同夏佳理（左）合作愉快，亦希望可以同下任主席繼續有良好合作。（資料圖片）