政壇：招待千五人賢慧社肉緊
香港青年聯會賢慧社主席Anthea羅詠詩尋日約埋副主席Maya林玉茵同周沁食飯，密斟四月十日舉行嘅第三屆「青聯賢慧愛家日」活動。Anthea話今年免費招待低收入兒童同家庭暢遊海洋公園嘅人數，由舊年嘅八百人倍增至一千五百人，規模龐大，所以更加唔可以掉以輕心喎！
Anthea同Maya係今屆愛家日活動嘅籌委會聯席主席，周沁係副主席，難怪三位靚女咁緊張。Anthea話今屆活動唔止帶小朋友遊公園咁簡單，仲會同青聯旗下「香港國學中心」合辦，喺現場向每位小朋友及嘉賓派發「弟子規」，到時千幾人同時宣讀，場面都幾壯觀，目的係宣揚孝順父母、尊敬師長嘅道理。
林玉茵（左起）、羅詠詩同周沁密斟，傾好青聯嘅活動細節。（受訪者提供）