政壇：搞搞政：百變形象第二波
早前剪咗一頭清爽短髮嘅立法會議員Tanya陳淑莊，外界對佢新形象有讚有彈。潮爆嘅佢，前日出席答問大會公審煲呔曾接受富商海陸空款待時，竟然戴上黑超，莫非佢係想表達自己「無眼睇」煲呔曾嘅劣行？定係想諷刺煲呔曾係貪官污吏呢？非也，查實係佢嘅形象轉變工程第二波─做咗激光矯視。
Tanya透露，上星期三去咗做激光矯視手術，負責醫生要求手術後三個星期返去覆診，如果一切良好，四個星期就可以完全穩定，到時就唔使再戴超，即係話佢終於可以洗甩「四眼陳」個花名。佢仲強調戴黑超純粹保護對眼免受強光影響，冇乜特別意思喎。剪完頭髮仲做激光，係咪想增加吸引力？佢就好開心答話：「冇咁諗過㗎，但係咪出嚟個效果好咗，所以大家咁諗呢？」