政壇：網民寸唐唐唔識一蚊雞

唔知係咪自知選情危殆，特首候選人唐唐連日透過電台發炮抹黑對手梁振英，好似前日就暗示對方上台後，八萬五、負資產、燒炭、「一蚊樓」都會重臨，真係山草藥「噏得就噏」。不過，唐唐所講嘅「一蚊樓」，就被心水清嘅網民寸爆佢講錯嘢，其實係「一蚊雞」至啱，即酒樓推出「一蚊雞」吸引食客幫襯。網民仲輯錄咗當年黃子華嘅電影《一蚊雞保鑣》部分片段，該段講述黃子華話：「吖！你好嘢，咁都講得出！掌嘴！」用以寸爆唐唐亂咁噏 。

講開唐唐嘅錯嘢，尋日又有新笑料，佢向眾多選委發出信件，更正自己早前發出嘅一封信件，其中第二段第二行的「一直以來，但過政途上可算順利去幾個月所面對來自四方八面的打擊，給我極之深刻的教訓」有錯，如果從唐唐平時嘅說話表達，都係咁甩甩漏漏，並無不妥，但文字表達就唔通喇，所以佢更正為「一直以來，政途上可算順利，但過去幾個月所面對來自四方八面的打擊，給我極之深刻的教訓」，如果拉票寫成咁就大鑊喇。