政壇：新同盟籌百萬參選新東
新民主同盟喺區議會選舉攞到八席，成績算係唔錯。新同盟成員食髓知味，諗住派人出戰九月立法會選舉。但無財不行，佢哋繼續呻窮，成員之一嘅西貢區議員范國威話如果呢幾個月籌唔到八十萬至一百萬元選舉經費，就要同新界東新增嗰一席講拜拜喎！
之前盛傳新同盟會借票畀泛民其他黨派，等佢哋夠票入閘選超級區議員，但新同盟尋日否認呢個傳聞，話暫時未有任何泛民黨派接觸佢哋，又話七月先會決定係咪借票。不過，有人講笑咁話，既然佢哋手握八票，不如諗吓以一票十萬元賣畀其他黨派，咁做可籌夠立會選舉經費，一家便宜兩家着咪幾好？