政壇：肥仔明打機懶理打貪官
立法會內務委員會尋日辯論引用特權法徹查煲呔曾貪盡富豪提供嘅海陸空款待，面對咁嚴肅嘅事，好多泛民主派議員都爭取表態，誓要追究到底。不過，身為內會副主席嘅白鴿黨「肥仔明」李華明，開會期間竟然偷偷地攞部電話出嚟玩打麻雀遊戲，懶理議員討論徹查煲呔曾呢啲貪官污吏，真係玩物喪志。雖然佢九月唔參選立法會啫，但都唔使咁吓話？
其實肥仔明對呢啲高科技產品唔係好熟悉，所以佢玩嘅麻雀遊戲，都係囡囡幫佢下載嘅。所謂錯咗要認、打就企定，佢呢次斷正，並冇抵賴或否認，解釋因為旅遊界議員謝偉俊不斷阻撓用特權法查煲呔曾，搞到佢好唔耐煩同好忟，所以咪打牌洩憤囉！佢嘅解釋確實有啲牽強，但姑念佢有舉手贊成用特權法調查煲呔曾，總算將功補過。
李華明開內會顧住打麻雀遊戲，好彩最後有投票贊成用特權法徹查煲呔曾。