三月三日維園見 用腳踢走大貪官

三月三日維園見,不打倒香港第一貪官,誓不罷休!嗱,你唔好話唔知邊個係香港第一貪官呀,家陣全世界無人唔識呢個「香港和珅」——煲呔曾!

冇錯,煲呔曾同富商勾勾搭搭,黐飲黐食黐大屋,嗰副貪腐嘴臉同「台灣之恥」陳水扁有得揮!聽日市民遊行高舉反貪大旗,就係要打倒呢個香港第一貪官。大家仲記唔記得,○三年五十萬人上街遊行,搞到董建華要腳痛落台,今次隨時有人提早「退伍」!

即係咁,「曾商勾結」愈揭愈臭,但係「權」字兩個口,佢死「鴨」撐飯蓋,一味賴「市民要求提高咗」。不過咁,「曾商勾結」鐵證如山,反曾浪潮波瀾壯闊,跛腳鴨又頂得幾耐吖。佢尋日面對立法會公審時,終於宣布放棄租住「深圳禮賓府」,並向全港市民道歉喎……其實,係假道歉至真!

點解話煲呔曾假道歉?梗係啦,煲呔曾如果真心道歉,面對議員公審冇可能左閃右避含糊其詞,連同邊個富商朋友打交道都遮遮瞞瞞。一句講晒,所謂道歉,根本只係一場戲,煲呔曾擺明要死撐到最後一分一秒。

話時話,真係唔到你唔信邪,年初二車公靈籤係咁講嘅:何為邪鬼何為神,神鬼如何兩不分;但管信邪修正外,何愁天地不知聞。呢鋪確係一語成讖,曾蔭權家陣露出貪便宜舔到盡嘅邪鬼真面目,「曾商勾結」醜聞轟動國際,今次真係何愁天地不知聞咯!

叮佢個鎯鎯,香港話就話三權分立,互相監察,但係對住香港第一貪官居然無晒辦法!行政機關唔使講,煲呔曾係港府一哥,司局高官沆瀣一氣,一齊鬥衰鬥爛就差唔多,好似「謊唐僭建」嘅前二哥唐英年就係例子。司法機關亦係另一個圍威喂俱樂部,睇法官姪女襲警獲輕判放生就知啦。

至於立法會咯喎,好少少咁啦,不過都係作用有限。煲呔曾面對議員公審,一樣扮晒魚蝦蟹,假道歉之後,議員都冇佢符。

三權冇符,一「權」獨大,香港容乜易唔使五十年,已經好似神州大地咁淪為貪官樂園?好彩,香港仲有傳媒呢個第四權主持正義。各位市民請放心,《太陽報》同《東方日報》為民喉舌,必定繼續對貪官醜行窮追猛打,絕對唔會手軟o架!

嗱,太一叮再次提醒大家,聽日維園舉行反貪大遊行,不打倒香港第一貪官,誓不罷休。仲有吖,聽日《太陽報》及《東方日報》隨報附送反貪海報,大家遊行時記得帶埋吖!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報