政壇：唐唐廢噏20年有片為證

特首候選人唐唐口齒不清、語無倫次已廣為人知，有心水清嘅人最近就輯錄番唐唐過去二十年發表過嘅兩段言論，再同佢依家嘅言論比較，發現佢講嘢嘅技巧二十年來都冇乜改善，呢段名為《唐英年金句20年》嘅短片已上載YouTube。

短片頭一段係講唐唐接受電視訪問時話：「我覺得支持依家呢個制度呢，因為覺得現時呢個制度呢，係一個最有效率嘅制度，點解會係最有效率呢，因為呢個制度係最有效率嘅制度！」另一段係講：「我相信至於立場方面呢，譬如、可能、我相信會係，共識容易啲，會多啲共識嘅，可能譬如有啲issue（議題）可能，可能我覺得咁做法，可能我錯呢，傾完之後，可能真係我錯喎。」聽完都唔知佢講乜。

最後一段係佢早前回應浸會大學民調「早洩」風波：「捍衞我哋嘅核心價值，呢個係一個最核心嘅核心價值，我喺政府工作九年多，我自問對於捍衞核心價值，我哋係一定做到、做到加零一嘅！」講完嗰一刻，佢身後嘅競選辦職員都忍唔住竊笑。