政壇:林書豪變企業人辦啟示

美國NBA紐約人嘅當家控球後衞林書豪強勢崛起,喺全球捲起咗一陣陣嘅人潮同錢潮。財經雜誌《福布斯》於是喺「林瘋」身上整理咗畀企業嘅四堂課,各位打工仔都啱睇噃。

第一係工作環境同團隊,對成功非常重要。喺加入紐約人之前,林書豪先後畀勇士同火箭放棄,雖然佢依家紮起咗,但球隊裏面係有某啲因素幫佢完全發揮潛能。所以唔好將班天才橫溢嘅商業專家,隨便擺埋同一間辦公室就算,你需要經驗老到嘅領袖,培養尊重同團隊合作等心態,至可以化衝突為成就。

第二,要為一夜成功嘅成果做好準備。當你嘅產品一夕爆紅,就要面對更多營運上嘅挑戰、棘手嘅公共關係,甚至係對手嘅反應。成功會帶嚟紛爭同妒忌,要緊記注意形象,以前冇人理嘅失誤隨時可能變頭條新聞,搞到身敗名裂。

第三就係要堅持不懈。林書豪有哈佛學歷,大可揀條安全嘅路嚟行。但佢同好多成功企業家一樣堅持不懈,保持樂觀,咁樣先至可能將事業搞得成功。最後係機會出現喺眼前,就要好好把握。如果你發現新趨勢,就要搶喺人哋前面,盡量將效益發揮到最大呀。

最後就係要食頭啖湯,搶喺其他競爭對手起動前,就攞盡甜頭,佢哋舉咗個例子,慈善機構都用呢個方法,搶先將林書豪對湖人着嘅球衣,籌到四萬幾美元。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

林書豪(白衫者)掀起全球「林瘋」熱潮。