政壇:煲呔曾7.1無家可歸

面對各方連日猛烈批評,貪盡富豪海陸空款待嘅煲呔曾,尋日不情願下被迫出席立法會答問大會接受議員公審。煲呔曾見群情洶湧、民怨沸騰,終於宣布放棄租住富豪提供豪裝嘅深圳「禮賓府」,妄想洗脫貪瀆污名。由於煲呔曾位於港島麥當勞道六十四號嘅「僭建祖屋」仍然有租約在身,故此幾可斷定,佢執包袱遷出禮賓府後可能無家可歸,真係自作孽不可活,一切都係咎由自取。

祖屋唔夠放舊衫雜物

煲呔曾一心諗退休後入住近萬呎嘅深圳東海花園,年租八十萬元人民幣,如今佢單方面解除租約等於毀約,所以業主尋日講到明會沒收相等於三個月租金嘅訂金,即係大拿拿冇咗二十幾萬,對於貪小便宜兼孤寒成性嘅佢嚟講,肯定肉都赤埋。不過,唔見錢都係其次,相信佢最頭痕係即將要執包袱滾出禮賓府,相信要喺面對廉政公署調查佢涉嫌收受利益下,四出搵屋租。

之不過,佢間「僭建祖屋」有租約到年底,唔係佢兩公婆話住就住,除非毀約賠錢。不過,賠錢都係冇用,佢間祖屋「豆膶」咁細,邊度擺得晒佢多年來收收埋埋嘅禮物吖,好似賣剩嘅紅酒、佢老婆做女嗰陣時嘅舊衫、雜物等,唔係佢都唔使喺深圳租一間近萬呎嘅豪宅啦。

究竟煲呔曾兩公婆可以搬去邊呢?莫非折墮到要去瞓天橋底?做露宿者都未必得噃,事關會畀食環署趕o架!話唔定佢得閒可以好似以前九龍皇帝咁周圍寫吓大字,控訴社會搞到啲富豪唔敢再款待佢坐私人飛機、坐豪華遊艇、提供豪裝大屋等,難怪佢尋日喺答問大會上,講到想喊想喊咁款喇。

呢啲都只係假設,但有個事實就係萬一廉署喺冇受干預下鐵面無私,秉公調查煲呔曾涉嫌收受利益嘅行為,一旦入罪嘅話,咁就可能要喺赤柱監獄留番個海景位畀佢喇!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白