咫尺核災危機深 應變計劃太粗疏

危機應變有幾重要？有辦你睇，特首候選人唐英年一場「謊唐」僭建風暴，拆彈拆到一塌糊塗，結果民望一沉不起，選情一蹶不振，落得萬劫不復之地。

唐唐拆解唔到醜聞炸彈，最多斷送個人仕途，特首夢醒冇乜大不了，對香港人更加係喜訊添。但係，如果港府處理「核彈」危機輕率大意，咁就唔同嘞，香港七百萬市民分分鐘命仔凍過水。

大家可能會問，搞乜扯到核彈咁鬼死遠呀？唔遠，唔遠，只係五十公里咋，香港背脊就戙咗一棟位於深圳嘅大亞灣核電廠，簡稱「大核」。核電廠無事無幹唔覺佢存在，一旦爆大鑊，成個香港岌岌可危，同放個核彈喺身邊冇乜分別。特別係，當你知道港府對呢個大核彈幾咁掉以輕心，真係唔到你唔擔心！

嗱，趁住日本福島「三一一」核災事故一周年，綠色和平發表報告，促請各地政府制訂安全能源政策。報告更點名批評港府對大核一旦有事嘅應變計劃粗疏，隨時令香港陷於另一種福島危機，不怕一萬，就怕萬一，港府點都要做啲嘢。

曾蔭權咁鍾意接受富豪「關照」，家陣環保團體提出核災應變改善建議，閣下會唔會好似對富豪款待咁，撲住去欣然接受呀？

咪怪太一叮心直口快，港府會接受報告嘅可能性係零。唔係咩？大核喺港府口中係完美無瑕嘛，根本唔需要改善，即使出現一年內三宗事故咁鬼死牙煙嘅驚險情節，佢哋都當睇唔到，甚至砌詞隱瞞，淡化事件。咁又點樣寄望佢哋虛心納諫，為核災應變好好把關呢？

其實，港府現時嗰套大核事故應變計劃千瘡百孔，係人都知，唯獨港府自己唔知，或者知都唔肯認啫。好似疏散範圍定於二十公里，早就被專家插到飛起，建議大幅擴至八十公里。仲有，港府唔係研究喺核災中如何將第一手消息告知市民，而係叫市民一邊逃離，一邊自行留意傳媒消息，你話係咪搞笑吖！

都係環保組織諗得周到，設計咗款「咫尺核災」手機程式，一旦大核出事，畀市民可以偵到自己同大核嘅距離，逃難唔係盲舂舂。

一句話，核災危機巨大，全港市民都要出聲，促請當局未雨綢繆，早作準備。尤其係煲呔曾呀，下台後諗住入住深圳禮賓府，離大核更近，生命危險更大，為人為己，都係要負起最後責任，就當係贖罪吖，叮！