政壇：立會虎尾蘭大芭蕉吸毒
添馬艦新政府總部趕工趕出禍，立法會新大樓繼發現有致命嘅退伍軍人桿菌後，又被驗出空氣中總揮發性有機化合物（TVOC）含量超晒標，淪為惡菌同毒氣溫床，立法會秘書處尋日去信各議員，話大樓部分公用地方已經栽種咗大芭蕉同虎尾蘭，又畀議員一個星期時間，提供種植乜嘢植物、數量及位置等意見，點解秘書處要廣植上述兩種植物呢？
據講，虎尾蘭確有淨化空氣嘅功能，可以吸收空氣中嘅苯、二氧化碳同工業常用溶劑三氯乙烯，喺日間釋出氧氣，可謂天然嘅淨化器。不過大芭蕉吸毒嘅作用似乎唔多明顯，多用於烹飪等。反而吸毒力超強嘅「白鶴芋」同「火鶴花」，即係常見嘅白掌同紅掌仲有用，唔單止可以分解甲醛、甲苯等毒氣，有助淨化家具釋出嘅有害物質，顏色又鮮艷，議員同埋訪客見到都醒神啲啦。
大芭蕉
虎尾蘭