政壇：趙心樹潛水三周明蒲頭
浸會大學被踢爆民調早洩之後，傳理學院前院長趙心樹都喺院校師生狙擊聲中下台，但佢由農曆新年開始一直放假，經過三星期休假「避風頭」後，尋日終於結束休假，照計聽日就會為學生上課添。
據知，趙心樹仍保留講座教授教席，佢教授嘅科目有兩名學生，他亦正帶領三名碩士及博士研究生，所以聽日要如常返校上課。由於佢辭任院長後將減少大量行政工作，校方會同佢商討日後嘅工作，預計需待新學年先開始全新嘅工作安排。
至於浸大就已經刊登廣告全球招聘傳理學院院長，三月中便開始挑選合適人選作深入考慮，不過，新院長唔會好似趙心樹咁獲終身教席，合適人選將獲三年合約。