政壇：港交所加時李小加犯眾怒

金融業係本港嘅支柱，港交所下星期一開始又要加時，業界反對聲音不絕，工聯會嘅潘佩璆今日都會喺立法會提口頭質詢，尋日由香港證券及期貨從業員工會會長林德明帶頭嘅反加時遊行，潘佩璆都有到場聲援，業界仲整咗兩個創意十足嘅紙板公仔，將港交所主席同埋總裁李小加整到一身納粹裝，諷刺佢哋獨裁、霸道。

林會長話，今日潘珮璆議員喺立法會提口頭質詢時，佢哋就會喺外面聲援，有信心港交所會擱置實施第二階段加時，如果港交所唔擱置，佢就會公開二月九日同李小加開會嘅內容喎！佢透露，李總當日開會時，有提過話冇諗到業界對第二階段加時嘅反應會咁大！

尋日嘅遊行都算順利，喺遮打花園集合嘅時候，警察哥哥估計當時大約有三百人，林德明喺遊行完畢後就話，最高峰嘅時候應該多過一千人，而最後去到政府總部交信嘅時候就應該接近八百人。