政壇：梁高美懿 露口風擬從政
恒生銀行女大班梁高美懿突然宣布五月十一日正式離開服務咗三十四年嘅滙豐集團，圈中即有佢退休後或加入政府嘅傳言，梁太尋日好大方話，對於日後從政或者返銀行機構持開放嘅態度，咁講算唔算唔坐大班櫈，改走從政之路？
梁太有意入政圈，會唔會已經有特首候選人向佢招手，佢就笑笑口話：「咁好想像力嘅？」不過，身為選委嘅梁太既冇提名唐英年，亦冇提名梁振英，公平對待任何一個陣營。
尋日梁太出席恒生公布業績後翌日嘅例行記者會，大家都關注佢未來嘅動向，梁太話，退休後想抖吓先，去吓旅行、學吓嘢，不過佢有好多公職在身，所以估計都好唔得閒。佢語帶玄機話，下個月有朋友約佢去旅行，時間都仲OK，但係九月要睇吓情況喇，九月有立法會選舉，梁太算唔算露咗口風呢？
設計圖片