廉署應增透明度

高先生 （社福界）

「廉署應該公開交代係咪查緊曾蔭權，否則市民好似被蒙在鼓裏咁。特首做咗咁多涉嫌私相授受嘅嘢，佢推行政策都令人懷疑係咪為自己退休後鋪橋搭路！」

余先生 （大學生）

「ICAC用咗市民咁多公帑，但依家係咪查緊特首都冇人知，收得太密實喇，最好盡快查。有傳媒、議員同市民咁多群眾壓力，相信特首都驚驚地，唔敢利用職務阻撓調查。」

葉小姐 （大學生）

「香港係廉潔地方，公職人員有操守要遵從，曾蔭權唔可以就嚟卸任就接受款待，廉署一定要拍板查佢，唔係特首就有特權。不過講暫停佢職務都冇用，因為中央一定會保住佢。」

廖小姐 （賽馬會客戶服務員）

「ICAC應該公布係咪查緊特首，增加透明度，而曾蔭權收咗咁多利益，根本唔係合格嘅特首，富豪款待就要避嫌，最好佢出嚟交代所有嘢，列出所有單據。」

李小姐 （中學生）

「曾蔭權做咗四十年公務員，好應該知咩係收受利益。如果清白冇做過就應畀人查，依家佢態度明顯係此地無銀，ICAC要向市民交代調查進度。」

江小姐 （中學生）

「特首有咁多涉嫌利益輸送嘅問題，作為市民係接受唔到，佢代表香港出去外訪，都會影衰香港形象，但係要佢停職，又好似冇咗個領導者。」

陳先生 （工程師）

「我相信ICAC都做緊嘢，平時亦要繼續調查其他官員有冇收受利益。曾蔭權又上遊艇、又坐私人飛機，做特首呢個位係好勉強，好應該小心行事。」

雲小姐 （貿易）

「廉署應該增加透明度，話畀市民知係咪查緊特首，因為市民係有知情權嘅，特首同平民涉嫌收受利益，都要一視同仁處理。我相信廉署係公正嘅，特首都唔敢阻撓調查。」