烽火台：曾唐狗噏

昨晚，小生夢見一條打煲呔之縮骨精，與一個有膊頭有腰骨的男人狀物體交頭接耳，狗噏不斷。

曾：唐唐，人哋話你家地底有條私營紅隧，紅酒隧道咁解，係咪真o架？

唐：係真嘅，所以你有酒唔好擺去商家酒窖咁失策啦，擺嚟我度咪得咯，成二千幾呎。話時話，上次你大庭廣眾鬧人黑社會，家陣你畀人揭發出席江湖宴，究竟你係黑社會定白社會呢？

曾：即係咁，黑社會要地下發展，首先要好似你咁識得挖嘢，再挖深啲，再挖大啲，起個地下城，裝個地下組織都仲得。可惜啊，挖挖吓發生「唐生大地震」，挖出個大頭佛，哈哈，哈哈。

唐：過獎過獎，講到大頭佛，呢期曾老闆你認咗第二，絕對無人敢認第一！不過，家陣你剩得幾個月任期，無得腳痛，真係羨煞旁人！

曾：羨慕你就真，你含住金鎖匙出世，大把銀両，大把紅酒，得閒就搞吓課外活動，群鶯亂舞，多的是泛泛之交！

唐：查實你都唔窮，聽講你坐遊艇有夾錢喎，到底夾咗一蚊定兩蚊？講嚟聽吓呀。

曾：呸，我唔再同你狗噏，我要把握最後時間搵着數，搵到最後一分一秒！

唐：而我就死都唔退選，死撐到最後一分一秒，Yeah！