產科服務倒退 庸官唔該早退

呢期邊個最紅？梗係「香港第一貪官」曾蔭權啦！師奶鬧佢、學生藐佢、學者轟佢、廉署查佢、政黨諗住彈劾佢、網民問候佢……總之全城喊打，不容貪腐特首逍遙法外。

即係咁，煲呔曾淪為全民箭靶，都有兩類人或者會多謝佢嘅。一類係同樣醜聞纏身嘅政客，好似爆出「謊唐」僭建醜聞嘅唐英年咁。另一類咯喎，就係處理「雙非」孕婦不力嘅庸官，事關佢哋嘅鋒芒被煲呔曾掩蓋，唔使做眾矢之的。

當然啦，暫時避過輿論炮火，唔代表冇事發生，如果唔係，唐唐嘅民望就唔會跌到趴街，而港人對雙非孕婦搞到產房爆煲嘅不滿情緒亦與日俱增。

政黨調查顯示，接近八成半本地孕婦受訪者表示，雙非孕婦來港產子令婦產科及母嬰健康服務變差。另外，唔滿意或者好唔滿意服務嘅就有五成七。

人哋話，養兒一百歲，長憂九十九。而香港嘅未來媽媽就係憂上加憂，擔心完分娩服務，仲要憂心埋仔女日後嘅社會服務資源被雙非嬰擠佔。民調顯示，近九成人對此感到擔心，其中對教育資源嘅擔心最多，超過九成；其次係醫療，有八成。

大家知道香港人生育率點解咁低啦。十月懷胎，腹中骨肉隨時無床位出世；千辛萬苦搶到床位，又怕個Ｂ被質素每況愈下嘅母嬰健康服務靠害；仔女大啲又輪到怕無書讀。最慘仲係睇住下一代被港府嘅無能施政激到嘔白泡，做父母嘅又於心何忍呢！

呢，前日之嘛，又有政黨上街，炮轟港府阻截雙非孕婦不力，要求當局修改《基本法》，取消雙非嬰居港權。本地孕婦憂心忡忡，政黨政團聲嘶力竭，無他嘅，雙非嬰源源湧港，冇人想見到香港陸沉㗎嘛！

咦，雙非孕婦問題十萬火急，點解負責其事嘅食衞局局長周一嶽連影都唔見呢？就算修法需時，遠水不能救近火，咁釋法吖，一了百了拆除雙非炸彈。社會要求釋法之聲此起彼落，何解周一鑊冇厘反應？喂，周一鑊，你去咗邊呀？唔通群埋啲富豪遊山玩水，黐飲黐食？

叮你個鎯鎯，夕陽政府等收工，咁大個雙非孕婦問題擺喺眼前，煲呔曾唔理，走去同富豪吃喝玩樂，周一鑊又慢條斯理，唔嗲唔吊，兩位庸官不如提早退休啦，咪篤眼篤鼻。星期日千人怒圍禮賓府，咁啦，今次呢場反貪運動起「雙飛」，以後高呼曾蔭權下台時，嗌多一個名：周一鑊！