政壇：肥亨試坐新機唔使申報
國泰航空日前邀請一批嘉賓去美國西雅圖嘅波音飛機公司工廠接收新飛機，當中包括中策集團主席馬時亨同太太王培琪，期間參觀波音飛機工廠同航空博物館外，仲安排西雅圖市內遊。
曾任商務及經濟發展局局長嘅肥亨話，自從離開政府之後，國泰曾多次邀請佢出席活動，但佢都冇應承，今次撞啱佢同太太都得閒，加上有二十年冇去過西雅圖，所以先答應走一轉。佢笑笑口話：「我哋呢啲人就邀請得，因為唔使申報嘅！」莫非佢暗寸煲呔曾接受富豪提供嘅海陸空款待後要申報利益？
佢自言因工作關係，經常都要周圍飛去開會，好多時都係坐國泰商務客位，但短途都唔介意坐吓經濟位。今次國泰安排嘉賓回程返港試坐新機，本來獲安排坐商務客位嘅佢，專登降格去試坐「特選經濟客艙」，覺得幾滿意。
馬時亨（左）同太太參觀航空博物館時，忍唔住要坐上展品影相留念。