政壇：王國安絕食翻風凍到震

證券及期貨專業總會會長王國安，尋日終於完成絕食24小時嘅「真人騷」創舉，回想番呢24小時，真係有血有淚！

佢話前晚喺交易廣場門外絕食時，夜晚刮起大風，仲要係北風，真係好鬼凍，連佢哋所搭嘅臨時帳篷都差啲被吹倒，佢以一個字嚟形容：成晚係咁「震」，好鬼陰功喎！好彩晚上都有啲會員連同家人去探過佢，就算深夜兩點，都有會員嚟支持。

佢話今次絕食絕對感受到人情冷暖。金利豐老闆娘朱李月華打電話畀佢，叫佢着多件衫，因住冷親；證券學會會長李細燕、恒豐證券老闆張華峰同李君豪都有嚟探過佢。但佢就炮轟冇港交所職員嚟過，就算傍晚接收請願信，只係派出交易科主管戴志堅嚟。佢不滿行政總裁李小加同主席夏佳理唔親自出嚟接請願信，當眾撕爛封請願信。佢聲言今日不惜將CPT（專業培訓課程）改期，發動三百名會員參加反加時大遊行，估計場面聲勢浩大；誓言要喺港交所禮拜三開董事會前施加壓力。但聽聞董事會暫冇諗住轉軚！